Kenya Yatoa Msaada wa Tani 240 Kwa Uturuki
Taifa la Uturuki limefaidika na mchango wa Kenya kwa ushirikiano na Shirika la Umoja wa Mataifa la Uhamiaji (IOM) baada ya kupokea msaada wa tani 240 za kuwasaidia raia wake kufuatia tetemeko kubwa la ardhi.
Misaada hiyo imetumwa kutoka Uwanja wa Ndege wa Kimataifa wa Jomo Kenyatta JKIA hadi Kituo cha Adana Incirlik nchini Uturuki.
Miongoni mwa vifaa vilivyotolewa ni pamoja na Mahema 353, mabati 17,245, roli 1,261 za turubai za plastiki, mablanketi 26,565 na mikeka 34,705 ya kulalia.
Baada ya safari ya kwanza ya ndege mnamo Februari 23, shehena nyingine ya mahema, mahema ya handaki na vifaa vingine vya msaada pia vilitumwa.
Balozi wa Uturuki nchini Kenya Subutay Yuksel na Naibu Mkurugenzi wa Kanda wa IOM Justin MacDermott walitangaza kwamba safari mbili za ziada za ndege zilipangwa.
Akishukuru mchango huo, Ubalozi wa Uturuki mjini Nairobi ulisema, “Nyenzo za misaada ya kibinadamu, iliyotolewa na IOM ili kupunguza mateso ya raia wetu ambao wameathiriwa na janga la tetemeko la ardhi la hivi majuzi, zilitumwa Türkiye.”
Mnamo Februari 7, 2023, Waziri wa Masuala ya Kigeni Alfred Mutua alifichua kuwa Kenya itatoa michango kwa Uturuki.
Miongoni mwa vifaa ambavyo vingetolewa ni pamoja na nguo, chakula, bidhaa za haraka na misaada ya matibabu.
Kulingana na shirika la habari la CNBC, idadi ya vifo kutokana na tetemeko la ardhi nchini Uturuki iliongezeka hadi 44,128 Jumapili, Februari 26.
Wakati hakuna Mkenya aliyeripotiwa kuathiriwa na tetemeko la ardhi, serikali imemtaka Mkenya yeyote aliyekwama Uturuki kufikia msaada kupitia nambari ya dharura +905385020960
About The Author
