Siaya: Mwanamke Awaua Mamake, bintiye, Na Kumjeruhi Mpenziwe Kabla Ya Kujiua
Polisi katika kaunti ndogo ya Bondo kaunti ya Siaya wanachunguza kisa ambapo mwanamke mwenye umri wa miaka 30 anadaiwa kuwaua bintiye na mamake na kumjeruhi vibaya mpenziwe, kisha kujitoa uhai katika kijiji cha Nyangera Kambajo usiku wa kuamkia leo.
Mwanamke huyo aliyetambulika kwa jina la Macrine Atieno anadaiwa kumuua bintiye mwenye umri wa miaka 10 na mama yake Perez Anyango (60) kabla ya kwenda nyumbani kwa mpenzi wake na kumshambulia na kumjeruhi vibaya kabla ya kurejea nyumbani na kujinyonga.
Atieno anashukiwa kuwa na kutofautiana na mpenzi wake Kennedy Onyango, 35, kulingana na Msaidizi wa Chifu Austin Bunde.
Aliiambia wanahabari kwamba majirani wa Atieno waligundua mwili wake ukining’inia juu ya mti kwenye nyumba ya baba yake na wakaingia ndani kumjulisha mama yake, na kukuta maiti yake ikiwa imelala kwenye dimbwi la damu pamoja na mjukuu wake, ambaye alikuwa na majeraha kadhaa ya mapanga.
Bunde ameendelea kusema kuwa baadaye iligundulika kuwa mpenzi wa Macrine, ambaye anaishi katika mali moja, pia alikuwa katika hali mbaya kutokana na shambulio hilo linalodaiwa.
Kisha polisi waliitwa kwenye eneo la tukio, ambapo waliiondoa miili hiyo hadi katika chumba cha kuhifadhi maiti cha hospitali ya kaunti ndogo ya Bondo kwa uchunguzi wa upasuaji.
Mpenzi huyo, ambaye alikuwa amepoteza damu nyingi, anapokea matibabu katika kituo hicho.
Wakati uo huo, polisi wameanzisha uchunguzi kuhusu tukio hilo.
About The Author
