Mwili Wa Mwanamume Aliyenaswa Katika Mgodi Wa Siaya Watolewa
Mwili wa Gilbert Odhiambo Ogola, kijana wa miaka 28 ambaye alikuwa amenaswa ndani ya mgodi katika kijiji cha Sogo, Kaunti ya Siaya umepatikana saa 24 baada ya tukio hilo kutokea.
Robert Ng’etich, ambaye alisimamia zoezi zima, alikashifu kupuuzwa kwa tahadhari za usalama kwa wachimba migodi.
Alisema wale wanaopuuza ushauri kwamba migodi huenda ikaanguka msimu huu kutokana na mvua kubwa inayonyesha eneo hilo wameeka maisha yao hatarini.
Siku ya Jumanne mchana, wachimba migodi walinaswa ndani ya shimo wakati wakisukuma maji na kwa sababu hiyo, walikosa oksijeni, watatu waliokolewa na wanaendelea kupata nafuu katika Hospitali ya rufaa ya Siaya.
Mwili wa marehemu umepelekwa katika chumba cha kuhifadhia maiti cha hospitali ya rufaa ya Siaya.
About The Author
