Mwili Wa Mwalimu Aliyezama Kakamega Wapatikana
Mwili wa mwalimu wa shule ya St Peters Boys Mumias kaunti ya Kakamega ambaye alikufa maji baada ya ajali kwenye daraja Jumapili iliyopita umepatikana.
Mwili wa Joseph Ayoti Osuka leo ulipatikana katika Mto Lusumu eneo la Shikufu huko Mumias mashariki baada ya kutafutwa kwa siku kadhaa.
Marehemu, ambaye zamani alikuwa mwalimu katika shule ya upili ya Butere Girls anasemekana kuanguka mtoni baada ya kuhusika katika ajali Jumapili usiku.
Taarifa za polisi zinaonyesha kuwa ajali hiyo ilitokea saa 8:30 usiku wakati marehemu Ayoti alipomgonga mwalimu wa shule ya msingi aliyekuwa kwenye pikipiki kando ya barabara ya Butere-Mumias na kumuua papo hapo.
Shahidi alisema walijaribu kumsaidia mwalimu huyo lakini juhudi zao hazikuzaa matunda.
“Nilikuwa pale ajali ilipotokea. Alikuwa akiendesha kwa kasi na kumgonga mwendesha pikipiki kwa nyuma. Mwanamume huyo alifariki huku mwanamke aliyekuwa amembeba akipata majeraha mabaya, na tukamkimbiza hospitalini,” alisema James Omoko.
Wapiga mbizi wamekuwa wakiutafuta mwili wake hadi leo walipoupata.
About The Author
