Harusi Yatibuka Baada Ya Kugundulika Bwana Harusi Ameoa Na Ana Watoto Saba

Kizaaza kilizuka wakati wa sherehe moja ya kifahari baada ya Bi. Harusi kupashwa habari  kuwa anayefunga naye ndoa ana watoto saba.

Sherehe hiyo iliyokuwa ikifanyika siku ya jumapili tarehe 26 katika jimbo la Edo kusini mwa Nigeria iligeuka shubiri ambapo vilio vilitawala upande wa bibi harusi anaesemekana hakufanya upekuzi wa kina kuhusu mienendo kamili ya ”mumewe”  kabla ya kuamua  kufunga nae pingu za maisha.

Katika video iliyosambaa kwa kasi kwenye mitandao ya kijamii, eneo la tukio lilionekana kuvurugika baada ya viti, maua na mapambo kutupwa kila mahali.

Tukio hilo liliwaacha vinywa wazi na kwa mshangao mkubwa waalikwa pamoja na makasisi waliokuwa tayari kuwafunganisha.

Kwenye video hiyo iliyosambazwa kwa kasi, alisikika mtu akiwataka wanandoa  kufanya uchunguzi kabla ya kufanya uamuzi wao wa kufanya harusi au kuolewa.